Arctic Circle Businessip Paninnguaq Fleischer-Lyberth Destination Manageritut atorfinitsippaa. Paninnguaq Fleischer-Lyberth martsip aappaa aallarnerfigalugu atorfinissaaq, Qeqqata Kommuniata takornariarfissatut orniguffigiuminartumik ineriartortinneqarnissaanut inuussutissarsiornermut aammalu innuttaasunut iluaqutaasumik pilerinartuunissaanik ineriartortitsinermi qitiusumik inissisimassalluni.
Paninnguaq Fleischer-Lyberth Arctic Circle Businessip allaffeqarfiani martsip ulluisa aappaannit naapinneqarsinnaalissaaq.
– Paninnguaq sulianut piginnaaneqarluarpoq pimoorussisinnaassuseqarluarluni kiisalu sumiiffimmi takornariaqarnermut tunngasunik suliaqartunik ilisimasaqarluni. Sumiiffimmi tunngaveqartumik ineriartortitsinermi suleqatigiinnermilu ukiuni arlalinni misilittagaqarpoq, aammalu piginnaasai atorluarlugit pisarsiaqarnerulernissamut periarfissat pillugit suleqataasinnaanera pillugu qilanaarpugut , Arctic Circle Business allappoq.
Paninnguaq Fleischer-Lyberth Qeqqata Kommuniani misilittagaqarpoq, aammalu ukiuni arlalinni sumiiffimmi ineriartortitsinermut atatillugu suliaqarsimalluni – ilaatigut Aasivissuit–Nipisat UNESCO-kkut Nunarsuarmi Kingornutassanngortinneqarsimasumi site manageritut atorfeqarnermigut. Sumiiffimmi innuttaasut, inuussutissarsiortut, kulturilerisut aammalu oqartussaasut akornanni suleqatigiinnermi misilittagaqarpoq, kiisalu sumiiffiup periarfissai unammilligassaalu pillugit ilisimasaqarluarluni.
Destination Manageritut Paninnguup akisussaaffigisassavai:
- Takornariaqarnerup misigisaqartitsinermillu aningaasarsiornerup ineriartortinneqarneranik nukittorsaaneq
- sumiiffimmi suliffeqarfiit suliniutillu tapersersornissaat
- Sumiiffiup iluani suleqatigiinnernut nutaanut ineriartortitsineq
- Qeqqata Kommunia takornariarfittut kajungernartuusinnaanerata qulakkeerneqarnissaa
Arctic Circle Business suleqatigiinnissamut qilanaarpoq, aammalu Paninnguaq suliffeqarfimmut tikilluaqqullugu.
Paasissutissat sukumiinerusut:
Arctic Circle Business
Naasunnguaq Beck Kristensen
naasu@acb.gl
