Ulloq 27. januaari 2026 Arctic Circle Business aamma Qeqqata Kommunia ukiumoortumik Kangerlussuaq Science Workshop ingerlappaat – webinar nunanit tamalaanit peqataaffigineqartoq, ukiormannalu ilisimatusarfiusunit, oqartussaqarfinnit aamma nunarsuarmit tamarmit inuussutissarsiorfinnit 60-init peqataaffigineqarpoq.
Aaqqissuussaq ukiut tallimat tulleriillugit ingerlanneqarpoq aamma Kangerlussuaq ilisimatusarfissatut nunanit tamalaanit annertusiartortumik soqutigineqariartorpoq – ilaatigut Kalaallit Nunaannit, Danmark, UK aamma USA-mit peqataaffigineqarluni saqqummiisoqarlunilu. Ilisimatusartut aamma nunani tamalaani ilisimatusarfiusuni suliaqartut kiisalu issittumi ilisimatusarnermut toqqaannartumik attuumassuteqartut aalajangiisartut inuussutissarsiortullu peqataapput.
Arctic Circle Businessimi pisortaq, Naasunnguaq Beck Kristiensen, oqaluttuarpoq:
- Ilisimatusartut najukkami inuussutissarsiortunik qanimut suleqateqarnissaat Arctic Circle Businessimi uatsinnut pingaaruteqarpoq. Ilisimatusarneq najukkamilu inuussutissarsiorneq suleqatigiippata, pitsaanerusumik ilisimatusarneq inerneqarsinnaavoq aamma nunaqarfik Kangerlussuarmut naleqarnerulersitsisinnaalluni. Taamatoqqissaarlu peqatigiinnerup Kangerlussuarmik issittumi ilisimatusarfittut qitiusutut attassinissaq ineriartortitsinissarlu piviusunngortippaa.
Webinarip tunuliaqutaa
Webinarimut siunertaavoq, Kangerlussuarmi nunap immikkoortuanilu ilisimatusarnikkut suliat ingerlanneqartut pisussallu pillugit issittumi ilisimatusartunik katersortitsineq ilutigalugu nunani tamalaani ilisimatusartut najukkamilu inuussutissarsiortut akornanni suleqatigiinnermik nukittorsaanissaq. Taamaalilluni webinar ilisimatusarnerup, attaveqaasersornerup aamma najukkami kiffartuussinerup akornanni qitiusumik naapiffittut atuuppoq.
Tassunga ilassutitut nittartagaq www.scienceservices.gl pilersinneqarpoq. Tassunga ilassutitut nittartagaq www.scienceservices.gl pilersinneqarpoq. Tassani soqutiginnittut Kangerlussuup ilisimatusarfittut, misileraanermut aamma ilinniarfissatut tamakkiisumik takussutissarsisinnaapput kiisalu piumasaqaatit, aaqqissuussineq atortorissaarutillu pissarsiarineqarsinnaasut – minnerunngitsumillu webinarimit saqqummiussat takuneqarsinnaapput.
Kangerlussuaq – ilisimatusarnermut iluaqutaasinnaasunik immikkut ittunik periarfissalik
Kangerlussuarmi sermersuarmut, nunamut aamma kangerlummut immikkuullarissumik aqqutissaqarpoq, aqqusinikkut attaviit, mittarfik aalajaatsoq isumannaatsorlu, unnuiffissatut periarfissat amerlasuut kiisalu najukkami inuussutissarsiortut kiffartuussilluartut misilittagallillu, nunani tamalaaneersut suliniutaat pillugit suleqateqarnissamik sungiusimasallit.
Uumasut aamma silap pissusaanut attuumassuteqartut aarlerinartut pillugit ilisimasat nutaat
Pilersaarummi nuna tamakkerlugu aamma nunani tamalaani ilisimatusartut suliaminnut tunngatillugu arlalinik saqqummiipput. Pinngortitalerifimmi ilisimatusartup Mathilde Le Moullecip saqqummiussaa immikkut soqutigineqarluarpoq, tuttut aamma umimmaat qanoq nunamik atuisarnersut ilusiliisarnersullu ilisimatusarnermik nutaamik saqqummiussinerani. Kiisalu Phd.-nngorniaq DTU-meersoq Steffen Ringsø Nielsen Kangerlussuup Sisimiullu akornanni nuna qeriuaannartoq aamma nunap sisoorneri, nittaannerulernerata aamma siallernerulernerata aamma taakkua allannguutaat ukiuni kingullerni amerlasuunik nunap sisoorneranik kinguneqartut saqqummiuppai.
Kangerlussuarmi suleqatigiinneq ilisimatusarnermik piviusunngortitsivoq
Ukiormanna webinarimi erseqqissarneqarpoq, Kangerlussuaq suli issittumi ilisimatusarnermi qitiusumik aallaaviusoq. Najukkami suleqatigisat nukittuut aamma nunani tamalaani soqutiginninnerup annertusiartorneratigut nunap immikkoortua siunissami ilisimatusarnikkut nutaaliornikkullu suliniutinik tapersersuinissamut sakkussaqarlualerpoq.
