Ukioq 2025 kingumut qiviassagutsigu, ACB-mut annertuumik allannguuteqarfiusimavoq.
Ukioq 2025-imi sulisut annertuumik taarseraannerat pisimavoq. Nutaamik pisortaqalersimavugut tassa Naasunnguaq Beck Kristensen februarimi aallartippoq, Project Manager-erput Arnaaraq Hansen ilinniatussanngornini pillugu Nuummut Nuummat Tanja Møller-ip qaammatialuit qaangiummata Maniitsumi paarlappaa. Marketing manager Victoria Olsen aamma namminersulerniarluni aallartimmat atorfik Business Manager-nngorlugu Maniitsimi inuttalerneqarpoq tassa Kim Gravesen tassani siunnersuinermik suliaqarluni aallartilluni, paasinarsivoq Maniitsumi inunnik marlunnik atorfinitsitsineq aaliangerneq pitsaasuusoq. Tassami kisimiilluni siunnersuisarneq initusimammat pisariaqarlunilu projekt-ip annertuut suliarineqartussat sivitsortumik kivinnissai ajornarsimavoq, maannali projektit ingerlarsorlutik aallarteraqqinnerat nuannaarutissaavoq. Innovation Managererput taarsersimavarput, tassa Ivalup uninnerata kingorna ACB-mi sulisoreriigarput Susanne Høegh una qaammat aallartissimalerpoq siunnersuinermik misilittagaqarluarnera iluarisimaarparput. Destination Managererput Taatsi aamma unissalluni aalajangersimavoq, taarteraalu Paninnguaq Fleischer-Lyberth, Destination Arctic Circle-imut tunngatillugu periusissiamik suliaqartussanngorluni aallartittoq, tamannalu periusissaq timitaliiffigissallugu ukioq manna. Trail managererput Lisa Germany angajoqqaani utoqqalisut Australiamut orninniarlugit aaliangermat aamma inuulluaqqusariaqarsimavarput, sulili suliassat inaarsagassat ungasianiit suliarilaaqqassavai. Atorfigisimasaalu maanna inuttassarsiuleruttorparput allanngorlugu Trail, Content Manager marketing-imik ilallugu, suliat annertuut naammassereermata nittarsaassinerpullu inerisartariaqarmat allanngorlugu inuttassarsiorparput.
Aaqqissuussaqarfitsinnut taarseraaterujussuarneq oqimaassimavoq, taamaattumillu ukioq manna suliniutaasut amerlasuut naaammassisinnaasimanngilagut, suliassalli annerusut qulakkeersimavagut.
Inuussutissarsiutinik ineriartortitsinermi pisariaqartitat nutaat naapertorlugit Ukioq 2025 ACB-ip sulinermini periusissiassani aallussimavaa ukioq mannalu tassa 2026-miit 2030-mut periusissiaq atuuttoq malillugu sulinneq allartilluarsimavoq, periusissiaq siulersuisut peqatigeqqissaarlugit suliarineqarsimavoq ukiullu tamaasa taanna tunngavigalugu malitassamik suliaqartoqartarpoq tassa ukiumut anguniakkanik angusaqarnissamut pilersaarut sukumiisoq, anguniakkat, iliuusissat, piffissalersornerisigut, akisussaasut inuttalernerisigut, aammalu angusassanut nalilersueqqissaartuarneq najoqqutarineqarluni.
Sisimiuni inuussutissarsiornikkut 2025-mi ineriartortitsineq takornariaqarnermik periarfissanik nutaanik, kiisalu suleqatigiinnerup annertusineranik tassa Arctic Circle Businessip sumiiffimmi inuussutissarsiortut qanillilluinnarlugit sullissineratigut ineriartortitsineq tapersersorluarsimavaa. Arctic Circle Track ukioq kinngulleq ammarneqarsimasoq, aqqummi ineriartortitassami nunarsuarmit tamarmit soqutiginninneq annertusiartorpoq, tamannalu Sisimiut inuussutissarsiornikkut periarfissanik nutaanik ammaaffiulluni. Aqqummi takornariaqarnermik, ilisimatusarnermik aammalu inuussutissarsiutinik nutaanik pilersitsinissamut periarfissat ACB-p nutaaliornermi tapiisarnermi qinnuteqartut maanna eqqumaffigilluinnarlugillu tapersersorusuppai. ACB-p Sisimiuni allaffeqarnera 2025-mi aamma pingaaruteqartorujussuuvoq, tassami suliffeqarfiit sumiiffimmiittut suleqatiginerat, siunnersorneqarnissaat, aammalu ineriartortitsinermi ikorfartorneqarnissaat qanittumik ingerlanneqarsinnaammat. Sumiiffimmi inuussutissarsiortut pisariaqartitaannik paasinninneq annertusarsimavoq, aammalu inuussutissarsiutinut sullissineq pitsaanerulersimalluni.
Sumiiffimmi inuussutissarsiortut akornanni suleqatigiinneq, workshop-it, aammalu ineriartortitsinermi ataatsimiinnerit ACB-p peqataaffigai, tassanilu inuussutissarsiutinut periarfissat, unammilligassat, aammalu ineriartortitsinissamut periarfissat pillugit oqaloqatigiinnerit ingerlanneqartarlutik.
Maniitsumi inuussutissarsiornermut nikittoqarneranut tunngatillugu suliniuteqarnerput aammalu annerusumik iliuuseqarfiginiarnera takuneqarsinnaallualerpoq, tamanna ingammik peqquteqarpoq Vestnorden Fonden aammalu Naliup suleqatiginerisa nukittorsarneqarsimanerata kingunerigaa. Ukiuni pingasuni kingullerni aningaasaliisarfik Maniitsumi atortitsisaqattaarsimavoq, Nunatsinnilu atortitsisarnerisa 30% annertussuseringajallugu. Nalik aamma nunaqarfinnut angalanitsinnut Maniitsup eqqaani nassarsimavarput. Maniitsumilu takuneqarsinnaallualerpoq maanna, tassa illoqarfimmi suliffeqarfinnik nutaanik peqalersimavoq, kiinnat nutaat, piumassuseq aammalu illoqarfiup ineriartorneranut upperinninneq nutaaq piulersimavoq. Mininnagulu aamma eqqaarusunnarpoq sulisut marluulerneri annertuumik sunniuteqarluarlernerat illoqarfimmut annertuumik kivitsimmat. Siulersuisut november-imi ataatsimiigianerminni aamma namminersortut ikioqatigiilluarnerat annertuumik ersersinneqartoq malugaat.
2025-mi Kangerlussuarmi inuussutissarsiornermi ineriartortitsineq ingerlariaqqiffiusimavoq, allanngoriartornermi unammilligassartalik, kisianni aamma periarfissanik nutaanik ammaaffiusoq. Arctic Circle Businessip sumiiffimmi inuussutissarsiortut, takornariaqarnermik ingerlatsisut aammalu suliffeqarfiit angisuut akornanni attaveqaateqarnikkut ineriartortitsineq tapersersorlugulu malinnaaffigaa. Kangerlussuarmi timmisartuussinerit annikinnerulernerisa kingunerisaanik unnuisarfinni unnuisartut appariarujussuarnikuupput, qujanartumilli Albatros Kangerlussuarmi Air Greenland-imut timmisartuussinissamik isumaqatigiissuteqarnerata suli timmisartuussinermik ingerlatsiinnarsinnaaneq ingerlappaat, nuannaarutigissavarpullu aappaagumut Air Greenland aaliangersimammat ukioq 2027 minnerpaamik qaammatini sisamani timmisartuussiniarluni oqaatigimmagu, suleqatigisartagartik suleqatigeqqissagunikku natsorsuutigissavarput qaammatinik marlunnik suli sivisunerusumik timmisartuussinerit ingerlanneqarumaartoq. ACB-p suliffeqarfiit ataasiakkaat ineriartortitsinermi ikorfartorpai, ilaatigut pilersaarusiornerni, aningaasaliissutinik qinnuteqaatini aammalu ineriartortitsinermi siunnersuinermi nunaqarfiit mininnagit, nunaqarfinnut allanut angalanerit qaammatip tulliani ingerlanneqarumaarput ukiulli sinerani sukkulluunniit saaffiginninnerit pisarput. Ukiuni siuliini Sisimiut microinfrastrukturinut tapiissutinik aallunneqarsimasoq ukioq manna 1.mio sinnilinnik Maniitsumut pissarsivugut takornariaqarnermut atugassanik pitsanngorsaatissanik, aappaagu nunaqarfittagut qinnuteqalerutta aalluttussaavagut.
Nunatsinni ACB qularnanngitsumik pitsaanerpaamik aallarnisaasunut siunnersuisuuvoq. Tamanna ingerlattarparput siunnersukkatta naliginerasigut, ilusilersorluagaanerisugut aammalu aallarnisaanerit tapersersornerisigut. Oqaatigiinnarsinnaavarput Sisimiut aallarnisaanermut anersaaqarluartuaannarsimasoq, ineriartortitsineq, suleqatigiinneq aammalu inuussutissarsiutinik ineriartortitsineq pillugit suliniutit annertuut tunngavigalugit ingerlavoq. Ukioq tamakkerlugu suliffeqarfiit, kommuni aammalu inuussutissarsiutinik ineriartortitsinermi suleqatigisagut peqatigalugit ineriartortitsineq, periarfissanik pilersitsineq aammalu inuussutissarsiutitigut ineriartortitsineq anguniarlugu sulilluarsimavugut.
Ukioq nutaami Kommunemut ukiuni pingasuni tulliuttuni suleqatigiissutissaq atsiorparput, tassani ukiut pingasuunissaannut pissutaavoq kommunit avinnissaminnik pilersaaruteqarneri naatinnagilli nalilersuinerit siunissami qanoq aaqqiisoqarumaarneranik eqqartuinerit nanginneqarumaarlutik.
Inuussutissarsiornermut siuarsaarnermut aningaasat immikkoortitat Namminersornerullutik Oqartussat sinnerlugit aqutaraagut, tassani inuussutissarsiornermut suliniuteqartut 13-t tapiiffigineqarput, aammalu 25-it klippekortimik tapertipput, katillugu 1.3 millionit sinnerlugit agguaasimavugut. Atammimmi Cafe Atammik Kangerlussuarmi Atorluaasa aamma Arctic Ice Tours Maniitsumilu suliffeqarfiit sisamat Sisimiuni suliffeqarfiit arfinillit inuussutissarsiornermut siuarsaanermut aningaasanik taperneqarput.
Aningaasanik immikkoortitanik suliaqarnerput iluatsilluarpoq tassami ukioq siulleq agguaanneqartut nungunneqareermata Nammineerlutik Oqartussanut qinoqqittariaqarsimavugut taamaalilluta 700.000kr-inik peqqissinnaasimalluta.
Allannguuterpassuit ACB-imi piffissartuutaangaatsiarsimapput, taamaattumillu suliniutit pisarnitsituulli angusinnaasimanngilagut, tamannalu ilaatigut aamma sulisunik taarseraannerujussuaq peqqutaalluni. Taamaakkaluartoq isumaqarpunga inernerit angusimasagut tulluusimaarutigisinnaagigut, aammalu aaqqissuussasugut ataqqineqarluartut, allanngorarfiusumi ersarissunik oqariartuuteqartarsimagatta.
- ACB-mi sullissineq pitsanngorsarneqarpoq, ilaatigut sullitanut attaveqarneq, paasissutissanik ingerlatitseqqinneq aammalu siunnersuinermi ingerlaavartumik pitsaanerulersitsineq. Nittartagarput nutarterneqarpoq atuisunut naleqqunnerusumik paasissutissanik ujarlernissamut periarfissaqarluarnerulerluni. Aammalu ilaasortagut ukiumi nutaami ilassinniffigisarneri aallartinneqarpoq taamatuttaarlu 5.juni aallarnerfigalugu Maniitsumi Sisimiunilu allaffigisatsinni netværksmødertitsisarnerit allartittussanngorput.
- Destination Arctic Circle-ip ineriartortinneqarnera ingerlaqqippoq, takornariaqarnermut atatillugu periarfissat annertusarneqarput aammalu sumiiffinni inuussutissarsiutitigut periarfissat pitsaanerulersinneqarlutik. Ukioq manna takornariaqarnermut periusissiaq aallartisarparput ukiup naaneranut naammassissasoq naatsorsuutigalugu. Samarbejdsturisme Kangerlussuarmi pilotprojekteq Sisimiuni Maniitsumilu ingerlanneqartussaq aallartinneqarpoq. Sallinnguani umiarsuarnik takornariarfigineqarluartartumi suliat qangali pilersaarutaasut aallartinneqarput innuttaasunik ataatsimiisitsinermik aallarnerneqartut, maannalu aningaasassarsiornerit ingerlanneqaleruttorput kingusinnerusukkullu workshop-ertsitsinetaraqarumaarluni. Umiarsuanik takornariartaatinik akileraarutit sumiiffinnut tikinneqarsimasunut atorneqarnissai aaliangersinnaasimavarput tassa sumiiffinnut assigiinngitsunut iluaqutaasinnaaqqullugit.
- Arctic Circle Track-imut atatillugu pilersaarusiorneq ineriartortinneqarpoq, kommunip, suliffeqarfiit aammalu innuttaasut peqatigalugit ineriartortitsineq ingerlaavarluni.
- Inuussutissarsiutinik ineriartortitsinermi suleqatigiinneq annertusarneqarpoq, ilaatigut suliffeqarfiit, ilinniarfiit aammalu pisortat akornanni suleqatigiinnerup nukittorsarneqarneratigut. Nunarput tamaat eqqarsaatigalugu inuussutissarsiornermi periusissialiornermi aamma ACB-miit peqataavugut. Ukiup sinneranut assigiinngitsunik aaqqissuussanik pilersaaruteqarpugut soorlu tuttu skindworkshop Sisimiuni Maniitsumilu ingerlanneqassaaq. Inuili susassaqartullu allat peqatigalugit Food Festival Maniitsumi ingerlatissavarput.
Bestyrelsip sulinera
Ukioq 2025-mi bestyrelsi ingerlatsinermut, ineriartortitsinermut aammalu strategiimut tunngatillugu aalajangiinernik pingaarutilinnik suliaqarsimavoq. Bestyrelsip ukiumut anguniakkat erseqqissarneqarnerannut, ingerlatsinermut aqutsinermut aammalu ineriartortitsinermut tunngatillugu aalajangiinerit pingaarutillit suliarisimavai.
Ukiup ingerlanerani unammilligassat
Ukioq 2025-mi unammilligassat arlallit takkussimapput, kisianni tamarmik pitsaasumik aqunneqarsimallutik:
- Inuussutissarsiutinik ineriartortitsinermi pisariaqartitat sukkanerujussui, ilaatigut suliffeqarfiit pisariaqartitaannik allanngoriartuaartumik malinnaaneq. Assersuutigalugu timmisartumik nassiussanik angallassinermik ajornartorsiuteqalersimanerput inuussutissarsiortortatsinnut annertuumik eqquisimasoq.
- Sulisut pisariaqartinneqartut pillugit unammilligassat, ilaatigut inuussutissarsiutinik ineriartortitsinermi immikkut ilisimasallit pisariaqartinneqarmata.
- Takornariaqarnermut tunngatillugu allannguutit,
Unammilligassat tamaasa pitsaasumik aqunneqarsimapput, aammalu ACB-mi sulisut, bestyrelsi aammalu suleqatigisagut peqatigalugit aaqqiissutissanik pitsaasunik nassaarniartuaarsimavugut.
2026-mut takorluukkat
Ukioq 2026-mi ACB-mi anguniakkat pingaarnerit ukuussapput:
Inuussutissarsiutinik ineriartortitsineq ingerlaqqittumik nukittorsarneqassaaq, suliffeqarfiit tapersersorneqarnissaat aammalu periarfissanik nutaanik pilersitsineq tunngavigalugit.
Takornariaqarnermut ineriartortitsineq ingerlaqqissaaq, Destination Arctic Circle aammalu Arctic Circle Track tunngavigalugit. Nunarsuarmut nittarsaassinerit Qeqqata takornariarfissatut annertusarneqarnerunissaanut anguniagaqarnissaq. Sisimiuni, Maniitsumi aammalu Kangerlussuarmi tikilluaqqusissutit nutaat suliarineqarput, 2026-mi ikkussorneqarnissaat naatsorsuutigineqarluni.
Suleqatigiinnerit annertusarneqassapput, suliffeqarfiit, kommuni, ilinniarfiit aammalu pisortat akornanni suleqatigiinneq nukittorsarneqassalluni. CSR suleqatigiinnissamut isumaqatigiissusiorneqassaaq Qeqqata sumiiffik inuussutissarsiornermi piujuartitsisumik tunngavilimmik nunatsinni siuttuussaaq.
ACB-mi sullissineq pitsaanerulersinneqassaaq, sullitanut attaveqarneq, paasissutissanik ingerlatitseqqinneq aammalu siunnersuineq pitsaanerulersinneqassallutik. Soorlu siuliani eqqaareeriga Netværksmødet aallartissasut ilaasortat qanimut attaviginerunissai anguniagaavoq.
Neriuppunga ilaasortaasusi maanna 89-inngorsimasusi naammagisimaarinnillusi pisimasusi, sulilu ilaasortaarusuttusi, qulakkeerinneqataallusilu arlallit suli Arctic Circle Business-imut ilaasortaanissaat, tassami ataatsimoortilluta nukittunerussagatta. Inuussutissarsiorneq nukittooq aamma isumaqarmat atugarissaarneq patajaatsoq.
