Arctic Circle Business Sallinnguit ineriartortinneqarnissaanut A.P. Møller Fondenimit 3 mio. kr.-inik aningaasaliiffigineqarpoq. Sallinnguit Sisimiut eqqaanniittoq pinngortitamik kulturikkullu oqaluttuarisaanermik immikkuullarissumik pigisaqarpoq, tassani ukiuni 4.500-ni najugaqarsimanerup piniartarnerullu oqaluttuarisaanera Kalaallit Nunaata ullumikkut ineriartorneranut naapeqatigiiffiulluni.
Sallinnguit pillugit pilersaarutit ilaatigut aqqusiornermik, paasissutissiiffiusunik, isikkivinnik, ujaqqanik majuartarfilianik aqqutinillu pilersitsinermik imaqarput. Taakku tikeraanut aqqutigissaassapput, peqatigisaanillu kulturikkut pinngortitamillu eriagisassat mianernarnerpaat illersorlugit. Suliniut Nunatta Katersugaasivia Allagaateqarfialu, Sisimiut Katersugaasiviat kiisalu oqartussaasut attuumassuteqartut qanimut suleqatigalugit ineriartortinneqarpoq.
Suliniut Dronning Margrethes og Prins Henriks Fond-imit tapiiffigineqarportaaq, taakkua itsarnisarsiornermut tunngatillugu misissuinermut atorneqarlutik. Taamaalilluni sumiiffiup ineriartortinnissaa kulturikkut eriagisassat qitiutillugit ingerlanneqarsinnaaqqullugu. Ilutigaluguttaaq misissuinerit sumiiffiup oqaluttuarisaanera kulturikkullu kingornussat pillugit nutaamik ilisimasaqalersitsissapput.
Tamatuma saniatigut suliniut takornariaqarnermut akitsuutinit aammalu Namminersorlutik Oqartussanit EU-p aningaasaatai atorlugit ”Grøn Vækst”-ip ataani tapiissutinik pissarsisarpoq.
Kulturikkut oqaluttuarisaanermi sumiiffik ukiuni 4.500-ngajanni oqaluttuarisaanermik pigisalik.
Sallinnguit Sisimiut-ni qeqertaasaavoq Paaraarssuk-p kitaaniittoq. Sumiiffik Sisimiut Kalaallit Nunaatalu oqaluttuarisaaneranni piffissaneersunit assigiinngitsunit pingaarutilinnik itsarnitsanik peqarpoq, soorlu najugaqarfiusimasunik, iliveqarfinnik, ivigaasanik illulianik, illorsuarnik takisuunik, saviminilerinermik suliaqarsimanermut uppernarsaatinik kiisalu Saqqaq kulturiata nalaaneersunik. Sumiiffik kulturikkut kingornussatigut annertoorujussuarmik naleqarpoq, inissisimaffialu tunngavigalugu Destination Arctic Circle-mi kulturikkut pinngortitamillu tunngasumik takornariaqarnermut pingaarutilittut ineriartortinneqarnissaminut periarfissaqarluarluni.
Sumiiffik ullumikkut nunaqavissunik takornarianillu atorneqarluarpoq, tamanna nunap nungullariartorneratigut aammalu paasissutissiissutit maanna atorneqartut pisoqalinerisigut ersarippoq. Ullumikkut takornarissat arlalitsigut nalunaaqutsersugaanngitsumik ingerlaartarput, ilaatigullu oqaluttuarisaanermi pingaarutilinnik illukunut iliveqarfinnullu isertarlutik, tamannalu eriagisanik illersuineq pillugu inatsimmut naapertuutinngilaq.
Nunaqavissut piginnaasaat siunissami pinngortitamik kulturimillu suliniutinut nukittorsaataassapput.
Arctic Circle Business-ip suliniutaani pingaarutilittut ilaavoq inuussutissarsiornermik ineriartortitsineq tapersersuinerlu. Suliniutip piareersarnerani erserpoq immikkut ittunik piginnaasaqarnissaq pisariaqartinneqartoq, suliniummi matumani aammalu siunissami nunap ilusaanik ineriartortitsinermi suliniutini, pingaartumik kulturikkut pinngortitamillu illersugaasuni takornariaqarnerullu annertusiartorfiani.
Tamanna ilaatigut pinngortitami aqqutiliassanik ujaraasanillu majuartarfinnik sanaartornermut kiisalu nunaninertamik iluarsaassinermut aserfallatsaaliuinermullu tunngavoq. Taamaattumik Arctic Circle Business aasaanerani Sallinnguani pinngortitami aqqutinik iluarsaassinermik pilersitsinermillu pikkorissartitsivoq. Peqataasut aqqusiortarnermi iluarsaassinermilu tunngaviusunik aammalu suliassanik ingerlatsinermut atatillugu kulturikkut kingornussanik illersuineq, atortunik atuineq isumannaallisaaneq il.il. pillugit ilinniartitsiffigineqarput. Pikkorissarneq tunngaviusumik ilisimasanik sulinerullu nalaani misilittakkanik ataatsimoortitsivoq, siunertarineqarporlu nunaqavissut nunakkut aqqusinniornermi piginnaasat nukittorsarnissaat.
Tapiissutit Sallinnguit pillugit pilersaarutinik piviusunngortitsinissamut periarfissiipput
Fondinit tapiissutit ukiuni arlalinni misissuinerit ingerlanneqarnissaannut periarfissiipput. Eqqarsaataanikuusut titartagaasimasut maanna piviusunngortinneqalerput suliniutillu ukioq 2028 ilanngullugu ingerlanneqassallutik.
Arctic Circle Business-imi Project Manageri Tanja Møller oqarpoqr:
- “Suliniut aallartilluareerpoq, maannakkullu pingaarnerpaavoq nunaqavissunut tikeraanullu sumiiffiup orninneqarsinnaanera pitsaanerulersissallugu, peqatigisaanillu Sisimiut oqaluttuarisaanerannik kulturikkut oqaluttuarisaanermi pingaarutilinnik eriagisanik kiisalu pinngortitamik eriagisamik illersuineq. A.P. Møller Fondip tapiissutaa suliniummut piviusunngortinneqarnissaanut amigaataasumik aalajangiisuulluinnartumik tapersiivoq, taamaattumik periarfissaq maanna piviusunngormat nuannaarutigeqaarput.”
Siunertaavoq misigisaqarfiusussaq orniginartoq, tikikkuminartoq piujuartitsinermillu tunngaveqartoq pilersissallugu, taamaalilluni Sisimiut kulturikkut oqaluttuarisaanerata ingerlateqqinneqarnissaa kiisalu tikeraat sumiiffiup kulturikkut kingornussaanik oqaluttuarisaaneranillu pitsaanerusumik paasisaqalernissaat qulakkeerneqassammat.
Suliniut pillugu paasissutissat
- Sallinnguit ukiuni 4.500-ngajanni najugaqarsimanermik piniartarnermillu oqaluttuarisaanermik imaqarpoq.
- Suliniut Nunatta Katersugaasivia Allagaateqarfialu, Sisimiut Katersugaasiviat kiisalu oqartussaasut attuumassuteqartut suleqatigalugit ineriartortinneqarpoq.
- Dronning Margrethes og Prins Henriks Fond itsarnisarsiuut suliaannut oqaluttuarisaanermut tunngatillugu misissuinernut tapiivoq.
- Suliniut aammattaaq takornariaqarnermut akitsuutinit kiisalu Namminersorlutik Oqartussat EU-mit aningaasalersorneqartumik “Grøn Vækst”-imik pilersaarutaatigut tapersersorneqarpoq.
- Arctic Circle Business 2026-mi najukkami workshoppertitsivoq, tassani pinngortitami aqqusinnik iluarsaassinermut pilersitsinermullu kiisalu pinngortitamik kulturimillu aqutsinermut atatillugu najukkami piginnaasat nukittorsarneqarput.
- Suliniut 2028-mi naammassineqarumaartoq naatsorsuutigineqarpoq.
Paasissutissat sukumiinerusut::
Tanja Møller
Project Manager, Arctic Circle Business
Telefon: +299 383604
E-mail: tanja@acb.gl
