Pikkorissarneq Sisimiuni Sallinnguit – aqqut orningarneqarluartartumi pinngortitami aqqutinik iluarsaassinermut, pilersitsinermullu tunngasoq, inunnit 13-init peqataaffigineqarpoq. Aqqutinik sanaartornermut tunngaviusumik paasissutissat aammalu pinngortitami misissueqqissaarinermi, aserfallatsaaliuinermut iluarsaassinermullu tunngatillugu atorneqarsinnaasunik peqataasut sakkussanipput tassani pinngortitap kulturikkullu kingornussat illersorneqarnissaat immikkut isiginiarneqarpoq.
Pikkorissarnerup siunertaraa Kalaallit Nunaanni takornariaqarnerup annertusiartornera ilutigalugu pinngortitami aqqutinut piginnaasanik najukkani pitsanngorsaaneq.
Pikkorissarneq Arctic Circle Business-imit Arktisk Arkitekt, FRYDNREJN aamma U.S. Department of the Interior suleqatigalugit ingerlanneqarpoq, taakku tamarmik suliassaqarfimmi immikkut ilisimasaqarlutik. U.S. Department of the Interior-imik suleqateqarneq Kalaallit Nunaanni 2020-miilli suliniummut sivisuumik ingerlasumut ilaavoq.
Suliniaqatigiiffik taanna misilittagaqartuuvoq ilaatigut National Park Service aammalu oqartussaasoqarfiit allat takornariaqarnermut pinngortitami pisuinnaat aqqutaannik sanaartornermik,iluarsartuussinermik piujuaannartitsinermillu suliaqartuusut. Najukkami innuttaasut aalajangiinernut suliaqarnermullu peqataatinneqarnissaat pingaartinneqarpoq, takornariaqarnerup ineriartortinneqarnera najukkani pisariaqartitanik pissutsinillu aallaaveqassammat.
Sallinnguit ilinniarfittut atorneqartoq
Pikkorissarnerup ilarujussua orningarneqarluartartumi Sallinnguit-ni Sisimiuni ingerlanneqarsimavoq, tassani Arktisk Arkitek,FRYDNREJN aammalu Arctic Circle Business aqqutissamik pilersaarusiorsimapput najungaqartunik takornarissanillu atorneqarluarsinnaasumik.
Sallinnguit illoqarfiup qanittuani sumiiffiuvoq kulturikkut oqaluttuarisaanikkullu pingaarutilik. Sumiiffimmi Kalaallit Nunaata oqaluttuarisaaneranik ersiuteqartunik inuiaqatigiinnik, inuit kulturiannit, arfanniartarnermit annertuumik kiisalu kingusinnerusukkut suliffissuaqarnerup aallartinneranit aalisakkanik tunisassiorfinneersunik nassaassaqarpoq.
Aqqutit pitsaasumik suliarineqarsimasut, inuit ingerlaarfiinik aaliangiisuusinnaapput, taamaalillunilu pinngortitamik kulturikkullu kingornussanik aserfatsaaliisinnaallutik. Tamatuma saniatigut aqqutit tikeraanut najungaqartunullu tikikkuminarsaasinnaapput.
Pikkorissarnermi peqataasut periutsit suleriaatsillu atorlugit pisortatigoortuunngitsumik aqqutinik piianeq, naasoqassutsillu uterteqqinnissaa ilinniarpaat.
Hans Harmsen, Kalaallit Nunaata Katersugaasivia (NKA) Eqqissisisimatitanut tunngatillugu Katersugaasivilerisoq, pikkorissarnermi peqataasimavoq, imalu oqarpoq:
- “Aqqutiliornermut pikkorissarneq pissarsiaqarnarpoq naapertuullunilu. NKA-p periutsit ilinniakkagut Kalaallit Nunaanni tamani sulinermi atorsinnaassavaat, taassumalu takutippaa Sisimiuniinnaanngitsoq kulturikkut kingornussanik illersuinermi iluaqutaasinnaalluarnerat. Takornariaqarnerup annertusiartornera ilutigalugu, Kalaallit Nunaanni sumiiffiit assigiinngitsut aammalu nunaminertat eriagisassat tatisimaneqarnerulerput. Aqqutit pitsaasumik suliarineqarsimasut pilersinnerisigut sumiiffiit eriagisassat illersorsinnaavagut taamatuttaarlu takornarissat pitsaanerusumik misigisaqarnissaat qulakkeersinnaalissallugu”
Innuttaasut piginnaasaannik pisariaqartitsineq annertusiartorpoq
Pikkorissarneq najukkani aqqutiliornermut iluarsaassinermullu piginnaasatigut pisariaqartitsineq tunngavigalugu ingerlanneqarsimavoq. Pisariaqartitsineq naatsorsuutigineqarpoq Kalaallit Nunaanni pinngortitamut, takornariaqarnermut kulturikkullu kingornussanut tunngasunik suliniutit amerlanerusut aallartinneqarneranni suli annertusiartussasoq.
Arctic Circle Business aamma issittumi sanaartukkanik titartaasoq FRYDNREJN suleqatigalugu suliniummik ingerlatsivoq, tassunga ilaalluni Sallinnguani paasissutissiiviusumik aqqusinniornissaq. Siunertaavoq tikinneqarsinnaanermik atortulersuutinillu pitsanngorsaaneq kiisalu immikkut kulturikkut kingornussanik aqqutit eqqaanniittunik illersuineq paasissutissiinerlu.
Tamatuma saniatigut ukiuni aggersuni Kalaallit Nunaanni sumiiffinni assigiinngitsuni assingusumik suliniuteqarnissaq naatsorsuutigineqarpoq, ilaatigut UNESCO nunarsuarmioqatigiinnut eriagisassani Aasivissuit-Nipisani attuumassuteqartuni aammalu Kalaallit Nunaata kitaani nuna eqqissisimatitaq nutaaq Pilivik ilanngullugu.
Pinngortitami aqqutissanik pikkorissarneq najukkani sulianut tunngasunik piginnaasassanik ineriartortitsinermut alloriarneruvoq pingaarutilik, akisussaassuseqartumik ineriartortitsinermik kiisalu pinngortitap, nunap assingisa inuiaqatigiillu oqaluttuarisaanerannik eriagisassat illersornissaannik tapersersuisinnaasunik.
