Arctic Circle Businessip augustimi Maniitsumi aamma Sisimiuni workshopit marluk ingerlatippai, ammerisartoq aamma eqqumiitsuliortoq Sofie Amondsen suleqatigalugu. Katillugit 21-it peqataapput – Maniitsumi qulingiluat, Sisimiuni peqataasut 12-iullutik – ulluni tallimani peqataasut tuttup amia qanoq ileqqutoqqat malillugit suliarineqarsinnaanersoq ilikkarpaat, tamatumalu kingorna innuttaasunut aaqqissuussinerit ingerlanneqarlutik.
Projektip siunertaraa tuttup amiata atorluarneqarnerulernissaa. Sumiiffimmi imminut pilersornermik annertusaaneq ammillu qanoq suliuarineqarsinnaanersut, aammalu nutaamik qanoq atorneqarsinnaanersut. Projekti Aasivissuit‑Nipisat UNESCO‑kkut nunarsuarmi kingornussassanngortinneqarsimasut suleqatigalugit piviusunngortinneqarpoq, tassani anguniarneqarpoq piniarnermik kulturerput ullutsinni atulersimasarput naleqquttumik nunamiit pisunit ataavartumik atuisinnaanerup nukittorsarneqarnissaanut.
Qangatut assassorneq nutaaanik periarfissalik
Workshopernermi peqataasut sumiiffimmi pioreersunik suliaqarnissamik ineriartortitsinissamik nutaaliornissamillu pissarsipput. Ammerinermi teknikkip ilikkarnissaannaanngitsoq Sofie Amondsen-imut pingaaruteqarpoq, peqataasunut ammerinerup kulturitsinnut atalluinnarnera aamma pingaaruteqarpoq:
- “Uannut pingaarnerpaaq tassaavoq peqataasut ammit suliarineranni ingerlaqqinnissaminnut kajumissaarneqarnissaat. Tuttup amia nammineq pigisarput sorpassuarnut atorneqarsinnaavoq periarfissat amerlaqaat, aammalu peqataasut nammineq isumassarsiaat paasillugit nuannersuuvoq. Maniitsumi aamma Sisimiuni sapaatit akunnerini marlunni kingullerni taanna ersarippoq”
Aallarnisaasup Michaela Eliassen-ip workshopi ilaatigut iluaqutigaa, tuttup amianik qanoq suliaqarsinnaanerminut isumassarsiaqalerpoq:
- “Siullermik nammineq tuttup amia innerniarsarinikuuara, kisianni siullermeerluni ilisimasat amigaataanikuupput, taamaattumillu ajornakusoorsimavoq. Workshopimut peqataaneq assut nuannerpoq, aammalu tuttup amianik allaanerusumik suliaqarsinnaanerup ilikkarsinnaanera nuannersuuvoq. Periarfissat amerlaqaat, aammalu tuttup amianik qanoq allatut suliaqarsinnaanermik isumassarsiaqalerpunga.
Ilisimasaqalerneq kinguuariinnut tullernut ingerlateqqinneqassaaq
Projektimi ilisimasaqarneq inuusuttunut meeqqanullu ingerlateqqinneqassasoq pingaaruteqarpoq. Qeqqata Kommunia suleqatigalugu utoqqaat peqatigiiffiat peqataatinneqarpoq, siunertaralugu siunissami meeqqanut inuusuttunullu aaqqissuussinissamut piginnaasaqalersinneqarnissaat.
Maniitsumi Efterskolimi ilinniartitsisoq Ruddie Motzfeldt peqataavoq, ilisimasat ingerlateqqinneqarnissaannik kissaateqarluni:
- “Workshopimi peqataaneq assut tunisivoq. Ilikkakkakka efterskolimi atuartunut ingerlateqqissinnissaanut qilanaarpunga – aammalu nammineq meeqqannut aamma ingerlateqqissinnaanngorpakka.”
Arctic Circle Businessip SOAM‑UNNI v/ Sofie Amondsen qutsavigaa ilisimasaqarnerminik avitseqatiginnissinnaammat. Qeqqata Kommunia aamma Aasivissuit Nipisat suleqataanerat pillugu qutsavigaagut.
