Qaammatini kingullerni Maniitsoq timmisartuussinermi annertuumik unammillernartorsiorpoq. Nuup nutaamik nunat tamalaat akornanni mittarfittaarnerata kingorna Maniitsumut timmisartuussinerit annikillisimapput. Air Greenlandip ingerlaarfii allanngortinneqarmata ulluinnarni Maniitsumiit Nuummut ullormut ataasiinnarmik timmisartuussisoqartarpoq – piffissat aallarfiusussat allanngorartuupput ingerlaqqinnissamullu killeqarlutik. Tamanna inuussutissarsiortut, innuttaasunut aammalu pisortani sulisut akornanni ajornartorsiutinik annertuunik pilersitsivoq.
Arctic Circle Businessip Maniitsullu Mittarfiata paasissutissiinerat naapertorlugu timmisartuussinerit maannamut atuuttut sunniuteqareersimapput. Danmarkimut nunanullu allanut angalasartut amerlanerpaartaat Nuummut aqqusaarnerminni unnuisariaqartarput, taamaalillutillu aningaasartuuteqartariaqartarlutik ullullu suliffiusussat annaasaqarfigineqartarlutik. Tamatuma saniatigut Maniitsumi inuussutissarsiornermut tamanna annertuumik eqquivoq – pingaartumik aalisariutinik angisuunik ingerlatsisunut, sulisutik taarsernissaat sukkasuumik ingerlanneqartarnissaat pisariaqartittarpaat aammalu atortunik ajutoornikkut pisariaqartinneqartunik pissarsiniarneq piffissaq eqqorlugu pisariaqartittarlugu. Sumiiffimmut nassiussinerit siusinnerusukkut ullut 1–2-it ingerlaneranni pisartut maanna pissaarput kinguartoornerit annertusimmata.
Unammillernartut annertunerulersimapput Maniitsup umiarsualiviata nutarterneqarnera naammassilluinnalerpoq anginerusunillu kilisaatinik tikittoqarsinnaalissalluni, taamaattorli aalaakkaasumik timmisartuussinerit amigaatigineqarnerat Maniitsumut inuussutissarsiornermi inuiaqatigiinnilu periarfissanik annaasaqarfiulersitsisinnaavoq – piffissami atortulersuutit ineriartortitsinissamut aningaasaliinernullu periarfissiinerani.
Arctic Circle Businessip Maniitsullu Mittarfiata siunnersuutigaat timmisartuussinerit assigiinngiiaartumik aalajangersimasumillu aaqqissuunneqarnissaat. Nuup Mnaiitsullu akornanni ullut suliffiusut tamaasa marlunnik timmisartuussisoqartarnissaa innersuussutigineqarpoq – ataaseq ullaakkut ataaserlu ualikkkut – ukiup ingerlanerani piffissanik immikkoortitsisoqarsinnaalluni ukiukkut aasakkullu assigiinngitsunik. Taamatut aaqqissuussineq inuussutissarsiortut, takornarissat aammalu nassiussanik ingerlatallit pitsaanerusumik kiffartuussinneqarnissaat kiisalu pioreersut pitsaanerusumik atorluarneqarsinnaassapput.
Air Greenland suleqatigalugu oqaloqatigiinnerit ingerlapput. Selskabip oqaatigaa timmisartuussinerit maannamut atuuttut pisariaqartitsineq siusinnerusukkut takuneqarsimasoq naapertorlugu naleqqussarneqarsimasut. Taamatuttaaq aasaanerani angallatinik angallassinermik suleqatigiissutigiineq ingerlasoq. Arctic Circle Businessip suliniutit taakku ilisimaarai, kisianni erseqqissaatigalugu angallatinik angallassineq timmisartuussinerit aalajangersimasut ukioq kaajallallugu matussusersinnaanngikkai – pingaartumik inuussutissarsiornermik, pisortani angalanerni aammalu nassiussanut pingaarutilinnut atatillugu.
Arctic Circle Business oqaloqatigiinnernut peqataassaaq, aammalu innuttaasut akornanni paasissutissiinissaq sukumiinerusumik ingerlatissallugu. Qeqqata Kommuniani ineriartortitsineq, najugaqarnikkut periarfissat aammalu inuussutissarsiornermi ineriartortitsineq timmisartuussinerit pitsaasut tunngavigalugit aatsaat qulakkeerneqarsinnaammata, suliffeqarfiit inuussutissarsiortullu pisariaqartitaat aammalu aningaasarsiornikkut tunngavissat ataatsimoorullugit eqqarsaatigalugit aaqqiissutissanik nassaarniarneq anguniagaavoq.
Paasissutissat sukumiinerusut pissarsiarineqarsinnaapput attavilerneratigut:
Arctic Circle Business
Naasunnguaq Beck Kristensen, 863500 / naasu@acb.gl
